Дастрасии Ваколатдор ба ҷойҳои маҳрумият аз озодӣ

Эътилофи ҷомеаи шаҳрвандӣ зидди шиканҷа ва беҷазоӣ дар Тоҷикистон силсиламатолибро дар бораи Мулоҳизаҳои ниҳоии Кумитаи СММ зидди шиканҷа оид ба гузориши даврии сеюми Тоҷикистон пешниҳод мекунад.

Кумитаи зидди шиканҷа (CAT) гузориши даврии сеюми Тоҷикистон (CAT/C/TJK/3)-ро дар ҷаласаҳои худ рӯзҳои 4, 7 ва 14-уми майи соли 2018 баррасӣ карда, мушоҳидаҳои ҷамъбастии мутобиқро қабул намуд.

Тавре Кумита зикр намуд, сарфи назар аз тағйироти ба Қонун «Дар бораи Ваколатдор оид ба ҳуқуқи инсон» (Омбудсмен) дар соли 2012 воридкардашуда, ки дастрасии ӯро ба ҷойҳои маҳрумият аз озодӣ пешбинӣ мекунад, дар амал Ваколатдор имкони аз ҳамаи муассисаҳои ҳабси пешакӣ боздид карданро надорад. Сухан аз ҷумла оид ба муассисаҳое меравад, ки таҳти назорати Кумитаи давлатии амнияти миллӣ, Раёсати мубориза бо ҷиноятҳои муташаккили Вазорати корҳои дохилӣ ва Раёсати мубориза бо маводи мухаддир қарор доранд.

Ғайр аз ин, Кумита изҳори нигаронӣ кард, ки Идораи Ваколатдор чун пештара аккредитатсияи категорияи "B" аз Алянси ҷаҳонии муассисаҳои миллии ҳуқуқҳимоякунандаро дорад, ки ин аз мустақилияти маҳдуд, маблағгузории нокифоя ва номутобиқатии Принсипҳои Париж шаҳодат медиҳад.

Дар тавсияҳои худ Кумита даъват кард, ки дастрасии пурра ва бе мамониати Ваколатдор оид ба ҳуқуқи инсон ба ҳамаи ҷойҳои маҳрумият аз озодӣ дар кишвар, инчунин нашри мунтазами гузоришҳои Ваколатдор, аз ҷумла интишори онҳо дар захираҳои расмӣ таъмин карда шавад. Кумита инчунин зарурати тақвияти мустақилият ва самаранокии фаъолияти Идораи Ваколатдорро тавассути маблағгузории кофӣ, раванди шаффоф ва фарогири интихоби кадрҳо ва мутобиқати пурраи кори муассиса бо Принсипҳои Париж таъкид намуд.

Аз нигоҳи Кумита, ин чораҳо барои тақвияти кафолатҳои ҳифзи ҳуқуқи инсон ва таъмини назорати муносиби шароити нигоҳдории шахсони дар ҳабс қарордошта муҳиманд.