Бознигарии парвандаи собиқ корманди милисаи Ёвон

Дар ҷануби кишвар бознигарии парвандаи собиқ нозири минтақавӣ Машраф Алиев, ки бо ҷурми истифодаи шиканҷа нисбат ба як ноболиғ айбдор дониста шудааст, оғоз гардид.

Ҷаласаи судӣ 24-уми сентябр дар бинои додгоҳи шаҳри Қӯрғонтеппа оғоз гардида, мурофиаро додраси суди шаҳрӣ Бахтиёр Искандаров раисӣ мекунад. Аммо мурофиа дер давом накарда, суд то соати 10-и рӯзи 26-уми сентябр танаффус эълон кард. Сабаби он ҳозир нашудани айбдоркунандаи давлатӣ ба мурофиа аст, ки ӯро бояд прокуратураи ноҳияи Ёвон таъмин мекард.

Талбон Сафаров, яке аз ҳимоятгарони судшаванда Машраф Алиев аз суд дархост кард, ки барои ҳозир нашудан ба мурофиа нисбат ба прокурор чора андешида шавад.

Ёдрас мекунем, ки ахири моҳи марти соли ҷорӣ ҳукм дар нисбати собиқ нозири минтақавии милисаи Шуъбаи ВКД ҶТ дар ноҳияи Ёвон Машраф Алиев, ки тирамоҳи соли гузшта барои шиканҷаи ноболиғ ва баромадан аз ҳадди ваколатҳои мансабӣ маҳкум шуда буд, бекор гардида, парвандаи ҷиноятӣ барои тафтишоти иловагӣ ба Прокуратураи генералии ҶТ фиристода шуд.

Аввали моҳи июл парвандаи ҷиноятӣ пас аз тафтиши иловагӣ ба суди ноҳияи Ёвон ирсол гардид.

Суди ноҳияи Ёвон рӯзи 24-уми июл баррасии дубораи парвандаи собиқ нозири минтақавӣ Машраф Алиевро оғоз кард. Аммо дар рафти мурофиа раисикунандаи суд Иброҳим Қурбонов бо дархости ҳимоятгари судшаванда худро аз баррасии парванда канор гирифт.

Ёдовар мешавем, ки сокини ноболиғи деҳаи Кулободи ҷамоати Чоргули ноҳияи Ёвон 29-уми апрел дар манзили истиқоматиаш дар ҳоли худро ба дор овехтан пайдо карда шуд. Наздиконаш писарбачаро аз банд берун оварда, дар ҳолати вазнин ба беморхона бурданд. Тафтишот муайян сохт, ки чанде қабл корманди милисаи маҳаллӣ бо гумони даст доштан дар дуздӣ, ӯро ба утоқи кориаш даъват намуда, писарбачаро таҳқиру дашном дода, ба хотири гирифтани гувоҳии иқрорӣ латукӯб кардааст. Бино ба маълумоти тафтишот, ноболиғ баъд аз муносибати дағалонаи корманди милиса даст ба худкушӣ задааст.

7-уми сентябри соли 2012 додгоҳи ноҳияи Ёвон Машраф Алиевро гунаҳкор дониста, ба 7 соли маҳрумият аз озодӣ маҳкум кард. Аммо додгоҳи вилояти Хатлон дар асоси эътирози раиси Суди олии ҶТ ҳукми додгоҳи Ёвонро бекор кард, зеро ба ақидаи ӯ, ҳукм нисбат ба Машраф Алиев сабук аст. Бо назардошти эътирози мазкур парвандаи ҷиноятӣ ба тафтиши дубора фиристода шуд.