Дар Душанбе масъалаи рушди системаи иҷрои ҷазоро баррасӣ карданд

03.04.2025 - 08:13

3-юми апрели соли 2025 дар шаҳри Душанбе конфронси ҷумҳуриявӣ бахшида ба рушди системаи иҷрои ҷазо дар Тоҷикистон баргузор гардид. Иштирокчиёни чорабинӣ самтҳои асосии ислоҳоти системаи пенитенсиарӣ ва қадамҳои амалии татбиқи стратегияи давлатӣ дар ин самт то соли 2030-ро мавриди баррасӣ қарор доданд.

Конфронс платформаи муҳими табодули афкор ва таҷриба байни намояндагони сохторҳои давлатӣ, созмонҳои байналмилалӣ ва ҷомеаи шаҳрвандӣ гардид. Ҳадафи асосӣ ба роҳ мондани ҳамкории муассир байни ҳамаи ҷонибҳои манфиатдор бо мақсади эҷоди системаи муосир ва инсондӯстонаи ҷазо мутобиқи меъёрҳои байналмилалӣ буд.

Чорабинӣ дар доираи фаъолияти Эътилофи зидди шиканҷа ва беҷазоӣ дар Тоҷикистон баргузор шуд. Конфронс аз ҷониби Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, дар якҷоягӣ бо Дафтари Швейтсария оид ба ҳамкорӣ дар Тоҷикистон, Фонди демократияи СММ (ЮНДЕФ), Ташкилоти ҷамъиятии «Маркази ҳуқуқи инсон» ва Фонди ҷамъиятии «Ташаббуси ҳуқуқӣ» ташкил карда шуд.

Дар рафти баррасиҳо ба масъалаҳои беҳтар намудани шароити нигоҳдории маҳбусон, ҷорӣ намудани чораҳои алтернативии ҷазо ва офиятбахшии иҷтимоии маҳкумшудагон таваҷҷуҳи махсус зоҳир гардид. Иштирокчиён инчунин аҳамияти ҳамкории байналмилалӣ ва табодули таҷрибаи пешқадамро барои татбиқи бомуваффақияти ислоҳот таъкид карданд.

Баргузории чунин вохӯриҳо аз талоши Тоҷикистон барои рушди системаи адолати судӣ бар асоси принсипҳои инсондӯстӣ, адолат ва самаранокӣ гувоҳӣ медиҳад.