"Муколамаи ором дар бораи чизи муҳим": манъи шиканҷа барои мо чӣ маъно дорад

Дар остонаи таҷлили Рӯзи байналмилалии дастгирии қурбониёни шиканҷа - 26-уми июн аъзои Эътилофи зидди шиканҷа ва беҷазоӣ дар Тоҷикистон андешаҳои шахсии худро дар бораи он ки манъи шиканҷа барои онҳо чӣ маъно дорад, мубодила мекунанд. Ин андешаҳои кӯтоҳ, вале пурзӯр як қисми маъракаи "Муколамаи ором"-анд.

"Манъи шиканҷа - ин на танҳо як амали инсондӯстона аст. Ин як марзи ҳуқуқӣ ва ахлоқӣ аст, ки инсонро аз амали хунукназарона муҳофизат мекунад. Вақте ки давлат ин марзро риоя мекунад, тасдиқ менамояд, ки шаъну эътибори инсон ҳадафи муҳим ба шумор меравад. Шиканҷа - ин замонест, ки ба ҷои қонун зӯрӣ истифода мешавад ва дар ҷойе, ки зӯрӣ болотар аз ҳуқуқ аст, он ҷо адолат нест".

Хуршед ҚУРБОНШОЕВ, ТҶ «Дафтари озодиҳои шаҳрвандӣ»

"Манъи шиканҷа - ин далели он аст, ки қудрати давлат амали ғайриинсониро сафед карда наметавонад".

Гулчеҳра РАҲМОНОВА, роҳбари ФҶ “Ташаббуси ҳуқуқӣ”

«Ҳамчун мутахассис оид ба ҳуҷҷатгузории ҳолатҳои шиканҷа ва муносибати бераҳмона, ман дар бисёр мавридҳо бо қиссаҳои дард ва ранҷе рӯ ба рӯ мешавам, ки дар натиҷаи раво дидани шиканҷа ба амал меоянд ва онҳоро наметавон ва набояд сарфи назар кард.

Манъи шиканҷа - ин танҳо як модда дар қонунгузории миллӣ ва байналмилалӣ нест. Ин як меъёри ахлоқист, сарҳадест, ки ягон шахс бо ҳеҷ ваҷҳ ҳақ надорад онро убур кунад. Шиканҷа - ин нобудсозии шоистагии инсон аст. Он на танҳо ҷисм, балки рӯҳу эҳсосоти инсонро мешиканад. Ва ягон далеле вуҷуд надорад, ки шиканҷаро қобили қабул гардонад.

Манъи шиканҷа - масъалаи сиёсат ё манфиатҳо нест. Ин масъалаи инсонгароист. Ин як арзиши мутлақ, бечунучаро ва умумибашарист, чун агар он аз байн бурда нашавад, худи мо ва ё дигар наздиконамон дар дилхоҳ ҳолат метавонем бо он рӯ ба рӯ шавем».

Хушбахт ИСОЕВ, ТҶ "Дунёи ҳуқуқ”

"Манъи шиканҷа - ин эътирофи бечунучарои шаъну шарафи ҳар як шахс ва марзҳое мебошад, ки давлат набояд ҳеҷ гоҳ убур кунад".

Зулфия МУСОЕВА, ФҶ “Ташаббуси ҳуқуқӣ»

"Шиканҷа на танҳо ҷароҳатҳои даҳшатнок мерасонад, балки шаъну шарафи инсонро низ паст мезанад".

Қурбонгул ҚОСИМОВА, ТҶ «Наҷоти кӯдакон»

#SupportVictimsOfTorture #26June #HumanRights #TortureIsACrime