Ёрии ройгони ҳуқуқӣ ба аҳолии Хуҷанд

13.02.2026 - 11:44

Аз 9 то 13-уми феврали соли 2026 ҳуқуқшиносони ташкилоти ҷамъиятии “Ҳуқуқи дастрас” - аъзои Эътилофи зидди шиканҷа ва беҷазоӣ дар Тоҷикистон ба сокинони Хуҷанд оид ба масоили ҳимояи ҳуқуқҳои инсон ёрии ройгони ҳуқуқӣ расониданд. Барои дарёфти машварат 20 нафар муроҷиат карданд.

Ёрии ҳуқуқӣ дар шакли машваратҳои шифоҳӣ расонида шуд: мутахассисон механизмҳои ҳимояи ҳуқуқҳои нақзшударо фаҳмониданд ва дар ҳолати зарурӣ муроҷиаткунандагонро ба мақомоти дахлдори давлатӣ роҳнамоӣ намуданд.

Муроҷиатҳои шаҳрвандон доираи васеи мавзуҳоро фаро гирифтанд. Аз ҷумла, ҳуқуқ ба манзили дастрас, бақайдгирии манзили истиқоматӣ, масоили бесарпаноҳӣ ва манзили иҷтимоӣ, эътирофи моликият ба сохтмонҳои худсарона, тартиби гирифтани шиноснома, пардохти боҷи давлатӣ ва ҷаримаҳо, ҳимоя аз шиканҷа ва муносибати бераҳмона, инчунин тартиби пешниҳоди шикоятҳо нисбати амалҳои шахсони ваколатдор.

Дар рафти кор ҳуқуқшиносон зикр намуданд, ки бисёре аз сокинон дар бораи тартиби эътирофи моликият ба сохтмонҳои худсарона маълумоти кофӣ надоранд ва ҳангоми бақайдгирии ҳуқуқи манзилӣ бо мушкилот рӯ ба рӯ мешаванд. Ҳамчунин, ниёз ба шарҳи минбаъдаи кафолати ҳимоя аз муносибати бераҳмона ва механизмҳои пешниҳоди шикоят вуҷуд дорад. Талабот ба машваратҳо оид ба масоили ба расмият даровардани ҳуҷҷатҳои тасдиқкунандаи шахсият боқӣ мемонад.

Бо мақсади риояи шартҳои махфият ва бехатарӣ, муроҷиаткунандагон аз аксбардории якҷоя бо ҳуқуқшиносон худдорӣ карданд. Ин қарор бар асоси зарурати нигоҳ доштани махфияти дархостҳои онҳо ва нигарониҳо аз оқибатҳои манфии эҳтимолӣ қабул карда шуд.

Сокинони Хуҷанд ба ҳуқуқшиносон барои дастгирӣ изҳори миннатдорӣ карданд. Онҳо гуфтанд, ки аз сабаби маҳдудияти имкониятҳои молиявӣ бисёриҳо муддати тӯлонӣ наметавонистанд барои дастрас кардани ёрии ҳуқуқии пулакӣ муроҷиат намоянд ва аз ин рӯ, машваратҳои пешниҳодшуда барои онҳо манбаи муҳим ва саривақтӣ гардиданд.

ТҶ “Ҳуқуқи дастрас”