26-уми июн дар тамоми ҷаҳон Рўзи байналмилалии дастгирии қурбониёни шиканҷа қайд карда мешавад, ки соли 1997 аз ҷониби Ассамблеяи генералии СММ бо мақсади бартарафсозии шиканҷа ва таъмини фаъолияти самараноки Конвенсияи зидди шиканҷа ва дигар муносибатҳои бераҳмона, ғайриинсонӣ ё пастзанандаи обруву эътибор ва ҷазо роҳандозӣ гардидааст.

15-уми июн Эътилофи ташкилотҳои ҷамъиятии зидди шиканҷа дар Тоҷикистон ба аксияи«Қурбонии шиканҷаро дастгирӣ намо! Беҷазоиро боз дор!» оғоз мекунад, ки то 26-уми июн идома хоҳад ёфт.

Аз 15-уми июн сар карда, ҳар рўз мо барои шумо дар торнамо ва саҳифаҳоямон дар шабакаҳои иҷтимоӣ қиссаи як қурбонии шиканҷа ва муносибати бераҳмонаро пешкаш менамоем.

Шумо чӣ кор карда метавонед? Метавонед дар шарҳи як ё якчанд қисса барои қурбони (ён)-и шиканҷа ва аъзои оилаи онҳо сухани дастгирикунанда нависед. Инчунин, шумо метавонед дастгирии худро тариқи видеоролики кўтоҳ (на зиёда аз 2 дақиқа) нишон диҳед ва зери қисса Хэштеги #notorturetj гузоред ё ба суроғаи электронии Эътилоф notorture.tj@gmail.com фиристонеду ҳамзамон, қиссаро бознашр кунед.

Тамоми суханҳои дастгирикунандаро мо ба қурбониёни шиканҷа ва муносибатҳои бераҳмонаву аъзои оилаи онҳо мебахшем ва инчунин, дар шакли маводи мултимедӣ дар торнамои Эътилоф ҷой медиҳем.

Қурбониёни шикандаро дастгирӣ менамоем! Беҷазоиро манъ мекунем!

10. Абдуваҳоб Қаюмов

Абдуваҳоб Қаюмови 18-сола, сокини ҷамоати Хистеварзи ноҳияи Бобоҷон Ғафурови вилояти Суғд орзуи ба академияи ҳарбӣ дохил ва афсар шуданро дошт. Ба ҳамин хотир, 5-уми майи соли 2015 ихтиёрӣ ба комиссариати ҳарбӣ рафт. Ў ба қисми низомии 2747-и қўшунҳои сарҳадии КДАМ ҶТ, ки дар ноҳияи Панҷ воқеъ аст, фиристонида шуд.

Баъди ду моҳ, 4-уми июл, аскари қаторӣ Исмоил Мамадёров ва сержанти хурд Шуҳрат Яқубов аз набудани сардор истифода бурда, ҳамхизматҳои худро дар сарбозхона қатор карданд ва баъдан он сарбозонеро, ки ба сафороии муваққатӣ дер омада буданд, латукўб намуданд.

Мамадёров ва Яқубов дар пушти сарбозон бо калтаки чўбин заданд. Дар натиҷаи латукўб аскари қаторӣ Абдуваҳоб Қаюмов аз ҳуш рафта, дар роҳ ба беморхона ҷон дод. Мувофиқи хулосаи судӣ-тиббӣ, сабаби марги ў ҷароҳатҳои зиёд аз зарбаи асбоби кунд будааст. Сутунмуҳраи гардани ҷавон шикаста буд.

Нисбати Исмоил Мамадёров ва Яқуб Шуҳратов бо моддаҳои 110, қисми 3 (қасдан расонидани зарари вазнин ба саломатӣ) ва 373, қисми 2 (вайронкунии қоидаҳои оинномавии муносибати байни хизматчиёни ҳарбӣ дар ҳолати набудани тобеият миёнашон) КҶ ҶТ парвандаи ҷиноятӣ кушода шуд. Нисбати прапоршик Хисрав Одинаев бошад, барои худсарона тарк кардани ҷойи хизмат бо моддаи 392, қисми 1-и КҶ ҶТ (муносибати хунукназарона ба хизмат) парванда боз карда шуд.

Суд Шуҳрат Яқубов ва Исмоил Мамадёровро гунаҳгор дониста, онҳоро ба муҳлатҳои 17 ва 16 соли адои ҷазо дар колонияи низомаш пурзўр ҳукм кард. Прапоршик Хисрав Одинаев ба муҳлати ду сол бо адои ҷазо дар муассисаи ислоҳӣ ҳукм гирифт.