Шоҳидони марги Ҳамзаро ба Хуҷанд интиқол доданд?

Наздикони Ҳамза Икромзода, мегӯянд, шоҳидони марги ӯро ба зиндони шаҳри Хуҷанд интиқол додаанд.

Амиралӣ Икромов, бародари Ҳамза Икромзода рӯзи душанбе ба радиои Озодӣ гуфт, ки Раёсати ислоҳии маҳбасҳои Вазорати адлияи Тоҷикистон дар нимаи аввали рӯзи 5-уми ноябр як гуруҳи маҳбусонро ба зиндони шаҳри Хуҷанд интиқол дод, ки дар миёни онҳо шоҳидони марги Ҳамза Икромзода низ будаанд.
Амиралӣ Икромов меафзояд, ки Муллоазизи Бобоазизов, Қайс Шарифов, Тоҷиддин Ризоев ва чанд нафари дигар, ки дар руйхати шоҳидони марги Ҳамза Икромзода дохил мешуданд, ҳамроҳи дигар зиндониҳо, ба шаҳри Хуҷанд фиристода шуданд. Вай мегӯяд, ки дар миёни ин маҳбусон, собиқ фармондеҳи Иттиҳоди мухолифини тоҷик Садриддин Тошев низ ба Хуҷанд фиристода шуд.
Аммо Дафтари матбуоти Раёсати ислоҳии маҳбасҳои Вазорати адлияи Тоҷикистон ба радиои Озодӣ гуфт, ки дар ҳақиқат субҳи имрӯз 20 нафар аз зиндониёни маҳбаси рақами аввал ба зиндони шаҳри Хуҷанд интиқол дода шуданд ва ин амал аз рӯи нақшаи доимамалкунанда, ки аз тарафи маъмурият анҷом дода мешавад, сурат гирифтааст.
Ба иттилои ин манбаъ, аз ин қабл як гурӯҳи зиндониёни маҳбаси шаҳри Хуҷанд бо боз шудани тунели «Шаҳристон» ба маҳбасҳои маркази ҷумҳурӣ интиқол дода шуданд. Ин манбаъ афзуд, қаблан ҷониби Узбакистон тавассути роҳи оҳан ба Душанбе ва ё аз шаҳри Душанбе ба Хуҷанд интиқол додани конвой, монеа эҷод мекард.
Дафтари матбуоти Раёсати ислоҳии маҳбасҳои Вазорати адлияи Тоҷикистон ба ҳадафи ба Хуҷанд интиқол додани маҳбусҳоро, ки гӯё махсус барои шоҳидони Ҳамза Икромзода сурат гирифта бошад, беасос шуморид.
Раёсати ислоҳии Маҳбасҳои Вазорати адлияи Тоҷикистон мегӯяд, ки рӯзи панҷшанбеи ҳафтаи гузашта Икромиддин Қараев, муфаттиши парвандаи Ҳамза Икромзода вориди маҳбас шуда буд ва бо гуруҳи шоҳидон, бо шумули Рафаэл Мақсудов ҳудуди панҷ соат сӯҳбат кард.