Ваколатдор: Дар шаш моҳ 15 шикоят дар бораи озодӣ аз зӯроварӣ ва муносибати бераҳмона ворид шудааст

Дар шаш моҳи соли ҷорӣ ба Ваколатдор оид ба ҳуқуқи инсон дар Тоҷикистон 787 муроҷиат (дар соли 2023-юм 871) ворид шудааст, ки ба ҳуқуқ ба манзил, таъминоти иҷтимоӣ ва нақзи ҳуқуқи инсон марбутанд. Тавре Умед Бобозода рӯзи 22-юми июл зимни нишасти матбуотӣ гуфт, аз ин шумора 160 шикояти хаттӣ, 618 шикояти шифоҳӣ, 5 шикояти электронӣ ва 4 шикояти телефонӣ мебошад.

Муроҷиатҳои хаттӣ асосан ба нақзи ҳуқуқу озодиҳои инсон ва шаҳрванд марбут будаанд: ҳуқуқ ба мурофиаи судии одилона - 13 муроҷиат, ҳуқуқ ба дахлнопазирии шахсӣ ва озодӣ аз ҳама гуна зӯроварӣ ва муносибати бераҳмона - 7 муроҷиат, ҳуқуқ ба манзил - 5 муроҷиат ва ғайра.

Муроҷиатҳои шифоҳӣ ҳам асосан ба нақзи ҳуқуқу озодиҳои инсон ва шаҳрванд дахл доштаанд: ҳуқуқ ба дахлнопазирии шахсӣ ва озодӣ аз ҳама гуна зӯроварӣ ва муносибати бераҳмона - 8 муроҷиат, ҳуқуқ ба манзил - 6 муроҷиат, ҳуқуқи замин - 3 муроҷиат ва ғайра.

Ба гуфтаи Бобозода, аз ҳамаи дархостҳои воридшуда танҳо 33 адад (5%) мусбат ҳал шудаанд.