Боздиди гузоришгари махсуси СММ оид ба шиканҷа аз Тоҷикистон

Боздиди гузоришгари махсуси СММ оид ба шиканҷа аз Тоҷикистон

Гузоришгари махсуси Созмони Милали Муттаҳид оид ба масоили шиканҷа Хуан Мендес рӯзҳои 10-12 феврал бо сафари расмӣ ба Тоҷикистон ташриф оварда, бо вазъи чанде аз муассисаҳои пӯшидаи ҷумҳурӣ шинос хоҳад шуд.

Дар ин бора имрӯз зимни нишасти хабарӣ Ваколатдор оид ба ҳуқуқи инсон дар ҶТ Зариф Ализода хабар дод. 

Ба гуфтаи ӯ, аз рӯйи натоиҷи сафари қаблии худ Хуан Мендес барои қатъ ё коҳиши назарраси падидаҳои манфӣ дар бахши риояи ҳуқуқи маҳкумшудагон якчанд тавсия дода буд, ки айни замон фаъолона амалӣ мешаванд.

«Аз ҷумла, масъалаи таъсиси гурӯҳи кории махсус, ки дар самти ошкор сохтани далелҳои шиканҷа дар маҳбасҳо мониторинг мегузаронад, ҳаллу фасл шуд. Қобили зикр аст, ки ба ҳайати ин гурӯҳ аъзои Эътилофи ташкилотҳои ҷамъиятии зидди шиканҷа дар Тоҷикистон низ шомиланд», - иброз дошт Ализода.

Зариф АлизодаНомбурда ҳамчунин гуфт, ки рӯзи 12-уми феврал бо иштироки намояндагони сохторҳои давлатӣ ва ҷомеаи шаҳрвандӣ семинар баргузор шуда, дар доираи он тавсия ва масоили матраҳкардаи Хуан Мендес баррасӣ мешаванд.

Ба қавли Омбудсмен, бо мақсади ҳимоя аз ҳуқуқи инсон дар низоми муассисаҳои пӯшида ва нимпӯшида соли гузашта кормандони дафтари Ваколатдор оид ба ҳуқуқи инсон аз ин муассиаҳо 21 боздид гузарониданд.

Қобили зикр аст, ки фаъолияти Гузоришгари махсус оид ба масоили шиканҷа барои тамоми кишварҳо, сарфи назар он ки оё давлат Конвенсияи зидди шиканҷа ва дигар намудҳои муносибат ва ҷазои бераҳмона, ғайриинсонӣ ё таҳкиркунандаи шаъну шарафро эътироф кардааст ё не, фаро мегирад. Ҷумҳурии Тоҷикистон Конвенсияи мазкурро соли 1995 пазируфтааст.

Азия-Плюс