Дар Хуҷанд мурофиаи судии кормандони милитсия, ки дар шиканҷаи боздоштшуда гунаҳгор дониста мешаванд, идома дорад

Дар шаҳри Хуҷанд муҳокимаи парванда оид ба шиканҷаи боздоштшуда Неъмат Ашӯрматов идома дорад. Дар курсии айбдорй чор нафар кормандони ШВКД-и Хучанд, аз ҷумла ҷонишини сардори шуъба нишастаанд. Онҳоро дар баромадан аз ҳадди ваколатҳои мансабӣ ва муносибати бераҳмона нисбати боздоштшуда гунаҳгор медонанд.

Мувофиқи маводҳои тафтишот, Ашӯрматов 22-юми феврали соли 2024 бо гумони даст доштан дар муомилоти ғайриқонунии маводи мухаддир боздошт ва ба бинои ШВКД бурда мешавад. Рӯзҳои баъдӣ ӯ ба шиканҷа ва муносибати бераҳмона гирифтор мегардад. Ҳангоми санҷиши прокурорӣ рӯзи 27-уми феврал ҷароҳатҳои ҷисмонӣ ба қайд гирифта шудаанд: 23 доғ ва се харошаи аз ашёи сахту кунд расонидашуда. Сарфи назар аз мавҷуд будани осори зӯроварӣ, додситонҳо амали кормандони милитсияро танҳо ҳамчун сӯйистифода аз мансаб арзёбӣ кардаанд, на шиканҷа.

Хонаводаи ҷабрдида ба Прокуратураи генералӣ шикоят бурда, тақозо кардаанд, ки нисбати кормандони ШВКД парвандаи ҷиноятӣ оғоз карда шавад. Танҳо пас аз ду моҳ, 29-уми апрел Прокуратураи вилояти Суғд нисбати чаҳор корманди милитсия парванда боз кард.

Адвокатҳое, ки Эътилофи ҷомеаи шаҳрвандӣ зидди шиканҷа ва беҷазоӣ дар Тоҷикистон пешниҳод кард, ба гузаронидани айбдорӣ ба моддаи шиканҷа муваффақ гардиданд. Аммо прокуратура қонеъ намудани дархостро рад карда, айбдории қаблиро боқӣ гузошт.

Мурофиаи судии оғозшуда таваҷҷуҳи ҷомеа ва ҳимоятгарони ҳуқуқро ҷалб кард. Масъалаи беҷазо мондани омилони шиканҷа дар мақомоти ҳифзи ҳуқуқ як мушкили мубрам дар Тоҷикистон боқӣ мемонад ва натиҷаи ин қазия нишондиҳандаи муҳими омодагии давлат ба мубориза бо муносибати бераҳмона дар низоми ҳифзи ҳуқуқ хоҳад буд. Эътилофи зидди шиканҷа назораи ҷараёни мурофиаро идома дода, аз мақомот даъват мекунад, ки шаффофият ва адолатро таъмин намоянд.